Bag-ong Tugon · Luke 15:11-32

Ang Anak nga Nagpatuyang

May usa ka tawo nga adunay duha ka anak nga lalaki. Ang manghud mihangyo sa iyang amahan sa iyang bahin sa panulundon sa dili pa panahon, ug wala madugay, gitigom niya ang tanan ug milakaw padulong sa halayong yuta, diin iyang giusik-usikan ang tanan sa mahilas nga pagpuyo. Sa dihang miabot ang grabeng gutom niadtong yutaa, nahibilin siya nga walay bisan unsa, busa napugos siyang motrabaho isip tigpakaon sa mga baboy -- gigutom kaayo nga bisan ang pagkaon sa mga baboy morag lamiano kaniya.

Sa iyang pagkahaw-as, nakahunahuna siya: "Ang mga sinuholan sa akong amahan adunay sobra nga pagkaon, samtang ako gutom nga gutom dinhi. Mopauli ako ug isulti kaniya nga nakasala ako batok sa langit ug kaniya, ug mangayo lamang nga isipon ako nga usa sa iyang mga sinuholan."

Samtang halayo pa siya, nakita na siya sa iyang amahan ug naluoy kini kaniya. Midagan ang amahan paingon sa iyang anak, gigakos siya, ug gihagkan. Sa wala pa mahuman sa anak ang iyang giandam nga paghangyo ug pasaylo, nagsugo na ang amahan nga kuhaon ang labing maayong bisti, usa ka singsing, ug mga sandalyas, ug nagsugo ug kombira: "Kining akong anak namatay na apan nabuhi pag-usab; nawala siya apan nakaplagan na."

Ang kamagulangan nga anak, nga bag-o lang miabot gikan sa uma, nasuko sa pagkadungog sa kasadya, ug midumili sa pagsulod -- matinud-anon man siyang nag-alagad sa tanan niining katuigan, apan wala gayud siya mahatagi bisan gamayng kombira. Migawas ang iyang amahan ug nagpakiluoy kaniya: "Kanunay kang uban kanako, ug ang tanan nako imo usab. Apan kinahanglan nga magsadya kita, kay ang imong igsoon namatay na apan nabuhi pag-usab."

Ipaambit kini nga sugilanon

Kopyaha ang link, unya i-paste kini sa imong Instagram post, story, o bio.

Basaha ang bahin sa Bibliya

Tan-awa ang tibuok teksto sa kasulatan nga gigikanan niini nga sugilanon.

15:11Ug siya miingon, "Dihay usa ka tawo nga may duha ka anak nga lalaki;
15:12ug ang manghud miingon sa iyang amahan, `Amahan, ihatag kanako ang akong bahin sa katigayonan.` Ug kanila iyang gibahin ang iyang katigayonan.
15:13Wala dangtig pila ka adlaw, sa nahipos na niya ang iyang tanang kabtangan, ang anak nga manghud mipanaw ngadto sa usa ka halayong yuta, ug didto iyang giusik-usikan ang iyang katigayonan pinaagi sa pagkinabuhi nga mapatuyangon.
15:14Ug sa nagasto na niya ang tanan, miabut ang usa ka dakung gutom niadtong yutaa, ug siya misugod sa pagbati sa kawalad-on.
15:15Busa siya miadto ug mikapyot sa usa sa mga nagpuyo niadtong yutaa, ug siya gisugo niini ngadto sa iyang kaumahan aron sa paglawog sa mga baboy.
15:16Ug siya nangandoy sa pagbusog sa iyang kaugalingon bisan pa sa mga bunga sa biya-tilis nga ginakaon sa mga baboy; ug walay tawo nga mihatag kaniyag bisan unsa.
15:17Apan sa nahiulian na siya sa pamuot, siya miingon, `Pagkadaghan gayud sa mga sinuholan sa akong amahan nga may mga pagkaon nga nanghingapin, samtang dinhi nagakamatay ako sa gutom!
15:18Motindog ug moadto ako sa akong amahan ug ingnon ko siya, "Amahan, nakasala ako batok sa langit ug sa imong atubangan;
15:19ug dili na ako takus pagatawgon pa nga imong anak; himoa na lang ako nga usa sa imong mga sinuholan."`
15:20Ug siya mitindog ug miadto sa iyang amahan. Apan samtang didto pa siya sa halayo, nakita siya sa iyang amahan ug kini giabut ug kaluoy, ug midalagan ug migakos kaniya ug gihagkan siya.
15:21Ug ang anak miingon kaniya, `Amahan, nakasala ako batok sa langit ug sa imong atubangan; ug dili na ako takus pagatawgon pa nga imong anak; himoa nalang ako nga usa sa imong mga sinuholan.`
15:22Apan ang amahan miingon sa iyang mga ulipon, `Dad-a ninyo dinhi sa madali ang labing maayong kupo ug isul-ob kini kaniya; ug butangig singsing ang iyang kamot, ug sapatosi ang iyang mga tiil;
15:23ug dad-a dinhi ang nating baka nga gipatambok ug ihawa kini, ug mangaon kita ug managsadya;
15:24kay kining akong anak namatay na, apan karon nabuhi siya pag-usab; siya nawala na, apan karon hingkaplagan siya.` Ug sila misugod sa pagsadya.
15:25"Ug ang iyang anak nga magulang didto sa uma; ug sa nagsingabut siya duol sa balay, iyang nadungog ang honi ug panagsayaw.
15:26Ug iyang gitawag ang usa sa mga binatonan ug iyang gipangutana siya ngano kadto.
15:27Ug kini mitubag kaniya, `Ang imong igsoon nahiabut, ug ang imong amahan nagpaihaw sa nating baka nga gipatambok, tungod kay kining igsoon mo nahiuli man kaniya nga buhi ug maayo rag panglawas.`
15:28Apan nasuko siya ug midumili sa pagsulod. Ug ang iyang amahan migula ug mialam-alam kaniya, 1368 Cebuano Bible Anonymous
15:29apan siya mitubag sa iyang amahan, `Tan-awa, sulod niining daghang katuigan nagaalagad ako kanimo, ug wala gayud ako makalapas sa bisan unsa nga imong gisugo; ngani wala ako nimo hatagi bisan na lang untag nating kanding aron makahimo ako sa pagsadya uban sa akong mga higala.
15:30Apan sa paghiabut niining imong anak nga milamoy sa imong katigayonan kauban sa dautang mga babaye, giihawan mo siya sa nating baka nga gipatambok!`
15:31Ang amahan mitubag kaniya, `Anak ko, sa kanunay nagpakig-uban ikaw kanako, ug ang tanang butang ko imo usab.
15:32Apan ang pagsadya ug paglipay kinahanglan himoon ta, kay kining imong igsoon namatay na, apan karon nabuhi siya pag-usab; siya nawala na, apan karon hingkaplagan siya.`"