Daang Tugon · Exodus 20:1-26

Ang Napulo ka Sugo

Human magiya sa Israel gikan sa Egipto, gidala ni Moises ang katawhan ngadto sa Bukid sa Sinai, diin nagpakita ang Dios taliwala sa dalugdog, kilat, ug baga nga aso, ug misulti direkta kanila. Gisugdan niya sa pagpahinumdom kon kinsa siya: "Ako si Jehova nga imong Dios, nga nagpagawas kanimo gikan sa Egipto, gikan sa yuta sa pagkaulipon."

Unya gihatag sa Dios ang napulo ka sugo aron sa paggiya kon unsaon pagkinabuhi sa iyang katawhan. Ang unang pipila nagsentro sa ilang relasyon sa Dios: ayaw pagsimba sa laing mga dios, ayaw paghimo ug mga diosdios, ayaw paggamit sa ngalan sa Dios sa walay pulos, ug bantayi nga balaan ang Adlaw nga Igpapahulay pinaagi sa pagpahulay gikan sa buhat. Ang uban nagsentro sa kon unsaon pagtratar sa usag usa: tahora ang imong amahan ug inahan, ayaw pagpatay, ayaw panapaw, ayaw pangawat, ayaw pagbutangbutang batok sa imong isigkatawo, ug ayaw kaibog sa iya sa uban.

Sa pagkakita sa katawhan sa dalugdog, kilat, ug ang naga-asoy nga bukid, nangurog sila sa kahadlok ug mipahilayo, nangamuyo kang Moises nga siya na lamang ang makigsulti kanila imbis nga si Jehova mismo mosulti, "tingali mangamatay kami." Gipasaligan sila ni Moises nga miabut ang Dios niining paagiha aron sa pagsulay kanila, aron ang kahadlok kaniya magpugong kanila gikan sa pagpakasala.

Miduol si Moises sa baga nga kangitngit diin didto ang Dios, ug midawat ug dugang mga panudlo -- lakip na kon unsaon pagtukod ug usa ka yano nga halaran nga yuta o wala matabas nga bato, aron makasimba ang katawhan sa paagi nga nagapasidungog sa Dios imbis sa ilang kaugalingong kaalam o garbo.

Ipaambit kini nga sugilanon

Kopyaha ang link, unya i-paste kini sa imong Instagram post, story, o bio.

Basaha ang bahin sa Bibliya

Tan-awa ang tibuok teksto sa kasulatan nga gigikanan niini nga sugilanon.

20:1Ug ang Dios misulti niining tanan nga mga pulong, nga nagaingon:
20:2Ako mao si Jehova nga imong Dios, nga nagbawi kanimo gikan sa yuta sa Egipto gikan sa balay sa pagkaulipon.
20:3Dili ka magbaton ug lain nga mga dios sa atubangan ko.
20:4Alang kanimo dili ka magbuhat ug usa ka larawan nga linilok bisan sa dagway sa bisan unsang butanga nga atua sa itaas sa langit, kun dinhi sa ilalum sa yuta, kun sa anaa sa tubig sa ilalum sa yuta:
20:5Dili mo iyukbo ang imong kaugalingon kanila, ni mag-alagad kanila; kay ako si Jehova nga imong Dios, mao ang Dios nga abughoan, nga nagadu-aw sa pagkadautan sa mga amahan sa ibabaw sa mga anak, sa ibabaw sa ikatolo ug sa ibabaw sa ikaupat ka kaliwatan sa mga nagadumot kanako,
20:6Ug nagapakita ako sa mahigugmaong kalolot alang sa linibo kanila nga nahigugma kanako, ug nagabantay sa akong mga sugo.
20:7Dili mo paggamiton ang ngalan ni Jehova nga imong Dios sa pasipala; kay si Jehova dili mag-isip nga walay sala niadtong nagagamit sa iyang ngalan sa pasipala.
20:8Hinumduman mo ang adlaw nga igpapahulay, aron sa pagbalaan niini.
20:9Sa unom ka adlaw magbuhat ka, ug buhaton mo ang tanan nga imong bulohaton;
20:10Apan ang adlaw nga ikapito maoy usa ka adlaw nga igpapahulay alang kang Jehova nga imong Dios. Niining adlawa dili ka magbuhat, ikaw, bisan ang imong anak nga lalake, bisan ang imong anak nga babaye, bisang ang imong sulogoon nga lalake, bisan ang imong sulogoon nga babaye, bisan ang imong kahayupan, bisan ang imong dumuloong nga anaa sa sulod sa imong mga pultahan.
20:11Kay sa unom ka adlaw gibuhat ni Jehova ang langit ug ang yuta, ang dagat, ug ang tanan nga anaa niini, ug mipahulay sa ikapito ka adlaw; busa gipanalanginan ni Jehova ang adlaw nga igpapahulay, ug gibalaan niya kini.
20:12Tahuron mo ang imong amahan ug ang imong inahan, aron magahataas ang imong mga adlaw sa yuta nga ginahatag kanimo ni Jehova nga imong Dios.
20:13Dili ka magpatay.
20:14Dili ka magpanapaw.
20:15Dili ka magpangawat.
20:16Dili ka magsaksi ug bakak batok sa imong isigkatawo.
20:17Dili ka maibug sa balay sa imong isigkatawo; dili ka maibug sa asawa sa imong isigkatawo, ni sa iyang sulogoon nga lalake, ni sa iyang sulogoon nga babaye, ni sa iyang vaca, ni sa iyang asno, ni sa unsang butanga nga iya sa imong isigkatawo.
20:18Ug ang tanan nga katawohan nahibalo nga dihay mga dalogdog ug mga kilat, ug tingog sa budyong, ug sa bukid nga nag-aso; ug sa nakakita ang katawohan niini, mikurog sila, ug nanagpahalayo sila .
20:19Ug miingon sila kang Moises: Makigsulti ka kanamo, ug kami magapatalinghug: apan ang Dios ayaw pasultiha kanamo aron kami dili mamatay.
20:20Ug si Moises miingon sa katawohan: Dili kamo mahadlok: kay ang Dios mianhi sa pagsulay kaninyo, ug aron ang pagkahadlok kaniya mahianha sa inyong atubangan aron kamo dili magpakasala.
20:21Ug ang katawohan nanagpanindog sa halayo, ug si Moises miduol sa mabaga nga kangitngit, diin didto ang Dios.
20:22Ug si Jehova miingon kang Moises: Sa ingon niini magapamulong ka sa mga anak sa Israel: Kamo sa inyong kaugalingon nakakita nga ako nagsulti kaninyo gikan sa langit.
20:23Dili kamo magbuhat ug laing dios uban kanako; mga dios nga salapi, kun mga dios nga bulawan, dili kamo magbuhat niini alang kaninyo.
20:24Usa ka halaran nga yuta pagabuhaton mo alang kanako, ug maghalad ka sa ibabaw niini sa imong mga halad-nga-sinunog, ug ang imong mga halad-sa-pakigdait, ang imong mga carnero, ug ang imong mga vaca: sa bisan diin nga dapit nga didto pagabuhaton ko ang pagpahinumdum sa akong ngalan, moanha ako kanimo, ug pagapanalanginan ko ikaw.
20:25Ug kong magatukod ikaw alang kanako ug usa ka halaran nga bato, dili mo pagtukoron kini sa mga bato nga sinapsapan, kay kong magbakyaw ka sa imong galamiton sa ibabaw niini, gihugawan mo kini.
20:26Ug dili ka magsaka sa mga ang-ang sa akong halaran, aron dili madayag diha ang imong pagkahubo.