Bag-ong Tugon · Luke 2:1-20

Ang Pagkatawo ni Jesus

Sa dihang nagsugo si Cesar Augusto sa pagpanglista sa tibuok kalibutan, kinahanglan mobiyahe si Jose gikan sa Nazaret paingon sa Betlehem, ang lungsod sa iyang katigulangan nga si David, uban ni Maria, nga nagmabdos. Sa pag-abot nila, wala nay lawak alang kanila sa balay-abutanan, busa sa pag-abot sa panahon nga manganak si Maria, giputos niya ang iyang bag-ong natawo nga anak sa mga bakbak ug gipahigda sa pasungan.

Niadtong gabhiona, sa kaumahan gawas sa Betlehem, may mga magbalantay nga nagbantay sa ilang mga karnero sa dihang kalit nga mitungha ang usa ka manolunda sa Ginoo, ug ang himaya sa Ginoo misidlak sa ilang palibot. Nangalisang ang mga magbalantay, apan miingon ang manolunda: "Ayaw kamo kalisang. Nagdala ako kaninyo ug maayong balita nga magdala ug dakung kalipay sa tanang katawhan: karon, sa lungsod ni David, natawo alang kaninyo ang Manluluwas -- siya ang Cristo nga Ginoo. Inyong makaplagan ang bata nga naputos sa mga bakbak ug nagahigda sa pasungan."

Kalit nga napuno ang langit sa daghang mga manolunda, nagdayeg sa Dios ug nag-awit: "Himaya sa Dios sa kalangitan, ug sa yuta panagdait sa mga tawo nga iyang gikahimut-an."

Human mibiya ang mga manolunda, midali ang mga magbalantay ngadto sa Betlehem ug ilang nakaplagan sila Maria, Jose, ug ang bata nga naghigda sa pasungan, sumala sa gisugilon kanila. Ilang gipakaylap ang balita nga ilang nadungog ug nakita, ug nahibulong ang tanan nga nakadungog niini. Gitipigan ni Maria kining tanan sa iyang kasingkasing.

Ipaambit kini nga sugilanon

Kopyaha ang link, unya i-paste kini sa imong Instagram post, story, o bio.

Basaha ang bahin sa Bibliya

Tan-awa ang tibuok teksto sa kasulatan nga gigikanan niini nga sugilanon.

2:1Ug nahitabo nga niadtong mga adlawa miabut gikan kang Cesar Augusto ang usa ka sugo sa pagpanglista sa tanang nanagpuyo sa tibuok kalibutan.
2:2Kini mao ang unang pagpanglista nga gihimo sa diha nga si Quirino mao pay gobernador sa Siria.
2:3Ug ang tanan nangadto aron sa pagpalista, ang matag-usa ngadto sa iyang kaugalingong lungsod.
2:4Ug si Jose usab gikan sa Galilea, sa lungsod sa Nazaret, mitungas sa Judea sa lungsod ni David, nga ginganlan ug Betlehem, kay siya sakop man sa panimalay ug sa kaliwatan ni David,
2:5aron sa pagpalista uban kang Maria, ang iyang pangasaw-onon nga nagsabak.
2:6Ug samtang didto sila, miabut ang panahon nga siya mag-anak.
2:7Ug iyang gianak ang iyang panganay nga usa ka lalaki, ug kini iyang giputos sa mga bakbak ug gipahigda sa pasungan, kay wala na may luna alang kanila sa balay nga abutanan.
2:8Ug niadtong dapita may mga magbalantay sa mga karnero didto sa sibsibanan, nga nanagtukaw sa kagabhion sa pagbantay sa ilang mga hayop.
2:9Ug mitungha kanila ang usa ka manolunda sa Ginoo, ug ang himaya sa Ginoo misidlak libut kanila, ug sila giabut ug dakung kalisang.
2:10Apan ang manolunda miingon kanila, "Ayaw na kamo kalisang; kay tan-awa, gidad-an ko kamog maayong balita sa dakung kalipay nga magaabut sa tanang mga tawo;
2:11kay alang kaninyo natawo karon sa lungsod ni David ang Manluluwas nga mao ang Cristo nga Ginoo.
2:12Ug ang inyong ilhanan mao kini: inyong makaplagan ang usa ka gamayng bata nga naputos sa mga bakbak ug nagahigda sa pasungan."
2:13Ug sa kalit diha uban sa manolunda ang usa ka langitnong panon nga nanagdalayeg sa Dios ug nanag-ingon,
2:14"Himaya sa Dios sa kalangitan, ug sa yuta panagdait sa mga tawo nga iyang gikahimut-an."
2:15Ug sa pagpamahawa na sa mga manolunda gikan kanila paingon sa langit, ang mga magbalantay sa mga karnero nasig-ingon ang usa sa usa, "Tana! Mangadto kita sa Betlehem ug tan-awon ta kining nahitabo nga gisugilon kanato sa Ginoo."
2:16Ug sila miadto nga nanagdali 1339 Cebuano Bible Anonymous ug ilang nakaplagan si Maria ug si Jose ug ang gamayng bata nga naghigda sa pasungan.
2:17Ug sa nakita na nila kini, ilang gipanugilon ang pulong nga gisulti kanila mahitungod niadtong bataa;
2:18ug ang tanang nakadungog niini nahibulong sa gisulti kanila sa mga magbalantay sa mga karnero.
2:19Apan kining tanang mga butanga gitipigan ni Maria nga namalandong niini diha sa iyang kasingkasing.
2:20Ug ang mga magbalantay sa mga karnero namauli nga nanaghimaya ug nanagdalayeg sa Dios tungod sa tanan nga ilang nadungog ug nakita sumala sa gisugilon kanila.